Н.Челебиджиханны аскерликке алалар

«Манъа тиймеген йылан бинъ яшасын» деген принцип иле иш корьгенлер чокъ олсалар да, Челебиджихан ойле инсанлар тавабасындан дегильдир. Багъчасарайгъалавасы Сулейман мырза Къырымтаевнен олгъан тартышмасы бунъа исбат ола билир. Меселе шунда ки, Сулейман Къырымтаев джаиль олса да, кенди зенгинлиги саесинде рус мемурларыны эльге ала билир эди. О, Багъчасарайгъалавасы олмакънен бирликте Акъмесджит уездининъ арбий ишлер комиссиясынынъ реиси эди. С.Къырымтаев «Терджиман» газетасынен дост дегиль, аксине душман эди. И.Гаспринский сагъ экенде Багъчасарай идареджилери кескин тенкъидге огъратыла эди. И.Гаспринский вефат эткен сонъ газетагъа Асан Сабри Айвазов муаррирлик япты. Багъчасарай шеэр идаресининъ эксикликлерини тенкъид эткен макъалелер газета саифелеринден тюшмей. Гаспринскийнинъ абруитибарындан бираз чекинген С.Къырымтаев Айвазовнынъ биберини эксильтеджек ола ве оны узурына чагъырта. С.Къырымтаев девирлер денъишкенини, консерваторларнен шиддетли фикир мунакъашасы алып бармагъа икътидарлы олгъан генчлик мевджут олгъаныны эсапкъа алмай. Асан Сабри Айвазов табиатынджа йымшакъ адам олгъаны себебинден С.Къырымтаевнинъ къабалыкъларына джевап бермей. Лякин Н.Челебиджихан С.Къырымтаевнинъ бу арекетлерини Къырым генчлигине косьтерильген акъарет, деп таный ве «Терджиман» вастасынен С.Къырымтаевге «дженк илян эте». С.Къырымтаев сусмагъа меджбур ола. Лякин киндар бир адам олгъан Къырымтаев ашагъан бу котегини унутмай ве арбий ишлер комиссиясынынъ реиси сыфатында кенди левазиминден файдаланып, Челебиджиханнынъ аскерликке чагъырылмасына ирише.